ಪರ್ಣ ಲೋಕ – ಭಾಗ 2

ಮನೆಯಲ್ಲಿ ಪುಟ್ಟ ಮಗಳೋ, ಮೊಮ್ಮಗನೋ ಇದ್ದಾರೆ ಅಂದುಕೊಳ್ಳಿ. ಬಾಲಲೀಲೆಗಳನ್ನು ಮುಗಿಸಿ ಬಣ್ಣದ ಬೆರಗಿಗೆ ತೆರೆದುಕೊಳ್ಳುವ ಸಮಯ. ಬಿಳಿ ಹಾಳೆ, ಬಣ್ಣದ ಕಡ್ಡಿಗಳನ್ನು ಕೊಟ್ಟರೆ ಒಂದಷ್ಟು ಹೊತ್ತು ಮನಸ್ಸಿಗೆ ತೋಚಿದಂತೆ ಗೀಚುತ್ತವೆ. ಆಮೇಲೆ ರಗಳೆ ಶುರು. ಪಕ್ಕದಲ್ಲಿ ಕೂತು ಚಿತ್ರ ಬಿಡಿಸಲು ಕಲಿಸುವ ಯತ್ನ. ಐದು ದಳಗಳ ಗೆರೆ ಎಳೆದು ಹಳದಿಯೋ, ಕೆಂಪೋ ತುಂಬಿದರೆ ಹೂವರಳುತ್ತದೆ. ಹೂವಿನಂಥ ಮಗುವಿನ ಮೊಗವೂ. ಆಮೇಲೆ ಹಸಿರೆಲೆ. ಮುಂದೆ ಮಗು ಕೊಂಚ ಬೆಳೆದಾಗ ಹೂವು, ಎಲೆ ಚಿತ್ರಿಸಿದರೆ ಮಾತ್ರ ಸಾಲದು. ಅದರ ಭಾಗಗಳನ್ನು ಗುರುತಿಸಬೇಕಲ್ಲ. ಅದೇ ಫಜೀತಿ. ಎಲ್ಲರಂತೆ ನಾನೂ ಅಂತರ್ಜಾಲ ತಡಕಾಡಿದೆ. ‘ಎಲೆಯ ಭಾಗಗಳು, ಎಲೆಯ ವಿಧಗಳು’ ಅಂತ ಒಕ್ಕಣಿಸಿದರೆ ತೆರೆದುಕೊಂಡಿದ್ದು ಬರೀ ಇಂಗ್ಲಿಷ್, ರಷ್ಯನ್ ಮತ್ತಿತರ ಭಾಷೆಯ ಚಿತ್ರಗಳು. ಆಗ ಇಂದುಮತಿ ರಾವ್ ಮತ್ತು ಸಿ.ಎನ್. ಆರ್. ರಾವ್ ಅವರ ‘ವಿಜ್ಞಾನ ಕಲಿಯೋಣ’ ಮಾಲಿಕೆಯ ಸಂಪುಟ 4 ತುಸು ನೆರವಿಗೆ ಬಂತು. ಭಾರತರತ್ನ ಡಾ.ರಾವ್ ದಂಪತಿ ಅಚ್ಚ ಕನ್ನಡದಲ್ಲಿ ಅಕ್ಕರೆಯಿಂದ ರಚಿಸಿದ ಬಹುವರ್ಣದ ಚಿತ್ರಸಹಿತ ಪುಸ್ತಕಗಳು ಪ್ರಾಥಮಿಕ ಹಂತದಲ್ಲಿ ವಿಜ್ಞಾನದ ಅಡಿಪಾಯ ಹಾಕಲು ತುಂಬಾ ಉಪಯುಕ್ತವಾಗಿವೆ.

ಇಲ್ಲಿ ಕೆಳಗಿರುವುದು ಎಲೆಯ ಸರಳ ಚಿತ್ರ ಮತ್ತು ಭಾಗಗಳು. ಇದು ಮೊದಲ ಹೆಜ್ಜೆಯಷ್ಟೇ. ವಿಶಾಲವಾದ ಪತ್ರ ಜಗತ್ತು ಇಷ್ಟು ಸರಳವಲ್ಲ. ಪರ್ಣ ವೈವಿಧ್ಯವನ್ನು ನಮ್ಮ ಬೆರಳಚ್ಚಿಗೆ ಹೋಲಿಸಬಹುದು. ಮುಂದಿನ ಕಂತುಗಳಲ್ಲಿ ಈ ವಿವಿಧತೆಯನ್ನು ನೋಡೋಣ.

– ವಿನಾಯಕ ಭಟ್ಟ, ನರೂರ

ವಿನಾಯಕ ಭಟ್ಟ ಅವರು ಉತ್ತರ ಕನ್ನಡ ಜಿಲ್ಲೆಯ ಶಿರಸಿ ತಾಲೂಕಿನ ನರೂರ ಗ್ರಾಮದವರು. ವಿಜ್ಞಾನ ಪದವೀಧರರು ಆಗಿರುವ ಇವರು ನಿವೃತ್ತ ಬ್ಯಾಂಕ್ ನೌಕರರು. ೨೦೦೪ರಿಂದ ಕೃಷಿಯಲ್ಲಿ ತೊಡಗಿಕೊಂಡಿದ್ದಾರೆ. ಅವರಿಗೆ ಓದು, ಪರಿಸರ, ಛಾಯಾಗ್ರಹಣ, ಪ್ರವಾಸ ಮತ್ತು ಗ್ರಾಮೀಣ ಬದುಕಿನ ಕುರಿತು ಆಸಕ್ತಿ.

೨೦೨೧ರಲ್ಲಿ ಫೇಸ್ ಬುಕ್ ನಲ್ಲಿ ಪರ್ಣ ಲೋಕ ಎಂಬ ಹೆಸರಲ್ಲಿ ಸುಮಾರು ೧೦೦ ಕಂತುಗಳಾಗಿ ವಿನಾಯಕ ಭಟ್ಟರು ಬರೆದಿದ್ದರು, ಆ ಲೇಖನಗಳು ಓದುಗರಿಗೆ ಮತ್ತೊಮ್ಮೆ ಸಿಗಲಿ ಎಂಬ ದೃಷಿಯಿಂದ ಬುಕ್ಸ್ ಲೋಕ ಪ್ರಕಟ ಮಾಡುತ್ತಿದೆ. ಈ ಎಲ್ಲಾ ಲೇಖನಗಳು ಮರುಪ್ರಕಟಣೆ ಮಾಡಲು ಅವಕಾಶ ನೀಡಿದ ವಿನಾಯಕ ಭಟ್ಟರಿಗೆ ಧನ್ಯವಾದಗಳು.
– ಭಾರ್ಗವಿ, ಬುಕ್ಸ್ ಲೋಕ