ಮಳೆಗಾಲದ ಶುರುವಿನಲ್ಲಿ ಅಪ್ಪಯ್ಯ ಕೆರೆ ಏರಿ ಮೇಲಿನ ಹಳೆಯ ಮಾವಿನ ಮರದಿಂದ ಒಂದಷ್ಟು ಮರಕೆಸದ ಎಲೆ ತರುತ್ತಿದ್ದ. ಅದರಿಂದ ಅಮ್ಮ ಪತ್ರೊಡೆ ಅಥವಾ ಕರಕಲಿ ಮಾಡುತ್ತಿದ್ದಳು. ಇತ್ತೀಚೆಗೆ ಮನೆ ಹಿತ್ತಲಿನ ಸಾದಾ ಕೆಸುವಿನ ಸೊಪ್ಪಿನಿಂದ ಮಡದಿ ಪದಾರ್ಥ ಮಾಡತೊಡಗಿದ ಮೇಲೆ ಮರಕೆಸದ ಮೋಹ ಕುಗ್ಗಿತ್ತು. ಕೆಲವು ದಿನಗಳ ಹಿಂದೆ ತರಕಾರಿ ಬೆಳೆಯುವವರ ವಾಟ್ಸಪ್ ಗುಂಪಿನಲ್ಲಿ (ATV) ಮರಕೆಸದ ಕೃಷಿ ಕುರಿತು ಬಿಸಿ ಬಿಸಿ ಚರ್ಚೆ ನಡೆದಿತ್ತು. ಕೆಸದ ಬುಡದಲ್ಲಿ ಹಾಕುವ ಸಾಮಗ್ರಿಯ ಬಗ್ಗೆ, ನೀರು ಹೆಚ್ಚಾದರೆ ಕೊಳೆತು ಹೋಗುವ ಬಗ್ಗೆ. ಅದೇ ವೇಳೆಗೆ ನಮ್ಮ ತೋಟದಲ್ಲಿ ನೆಲದ ಮೇಲೆ ತಾನಾಗಿ ಬೆಳೆದ ಮರಕೆಸ ಪುಟಾಣಿ ಸಸಿಗಳನ್ನು ಮೂಡಿಸಿ, ವಂಶಾಭಿವೃದ್ಧಿಯಲ್ಲಿ ತೊಡಗಿತ್ತು. ಅವುಗಳನ್ನು ಕೀಳದೆ ಹಾಗೇ ಬಿಟ್ಟೆ. ಆ ಸಸಿಗಳ ಎಲೆ ಹರವಾಗುತ್ತಿದೆ.
ಉಳಿದ ಕೆಸುವಿನ ಎಲೆಗೆ ಹೋಲಿಸಿದರೆ ಮರಕೆಸದ ಎಲೆ ಚಂದ. ತುಸು ದಪ್ಪಗಿರುವ ಇದು ತೀರಾ ನಾಜೂಕಲ್ಲ. ಹೊಳಪು ಹೆಚ್ಚು. ಎಲೆಯ ಹಿಂಭಾಗದಲ್ಲಿ ಸ್ಪಷ್ಟವಾಗಿ ತೋರುವ ಗೆರೆಗಳಿಂದ ಇದರ ಆಕರ್ಷಣೆ ಮತ್ತೂ ಜಾಸ್ತಿ. ಯಕ್ಷಗಾನ ವೇಷಭೂಷಣದ ಕಿರೀಟ/ಪಗಡೆಯ ತದ್ರೂಪ! ಅಂದಹಾಗೆ ಇಂಗ್ಲೀಷಿನಲ್ಲಿ ಇದಕ್ಕೆ hitchhiker elephant ear ಎಂಬ ಹೆಸರಿದೆ. ಆನೆ ಕಿವಿ ಅನ್ನೋದೇನೋ ಸರಿ. ಆದರೆ ಈ ಬಿಟ್ಟಿ ಪ್ರವಾಸ ಮಾಡುವವರು (hitchhiker) ಯಾಕೆ ಸೇರಿದರು ಗೊತ್ತಿಲ್ಲ.
The leaf is solitary, is broad and peltate, 10 – 40 cm long and 5 – 30 cm across, with a petiole upto 40 cm long. (ಕೃಪೆ: ವಿಕಿಪೀಡಿಯಾ)
40 ಸೆಂ.ಮೀ. ಉದ್ದದ ತೊಟ್ಟಿನ ಮೇಲಿರುವ ಅಗಲವಾದ ಒಂದೇ ಎಲೆ. ಇನ್ನು Peltate ಎಂಬುದಕ್ಕೆ ಗುರಾಣಿ/ಢಾಲು/ಶೀಲ್ಡ್ (ಪಾರಿತೋಷಕ) ಅನ್ನುವ ಅರ್ಥ ಕಂಡಿತು. ಸೂಕ್ತವಿದೆಯಲ್ಲವೆ?
– ವಿನಾಯಕ ಭಟ್ಟ, ನರೂರ
ವಿನಾಯಕ ಭಟ್ಟ ಅವರು ಉತ್ತರ ಕನ್ನಡ ಜಿಲ್ಲೆಯ ಶಿರಸಿ ತಾಲೂಕಿನ ನರೂರ ಗ್ರಾಮದವರು. ವಿಜ್ಞಾನ ಪದವೀಧರರು ಆಗಿರುವ ಇವರು ನಿವೃತ್ತ ಬ್ಯಾಂಕ್ ನೌಕರರು. ೨೦೦೪ರಿಂದ ಕೃಷಿಯಲ್ಲಿ ತೊಡಗಿಕೊಂಡಿದ್ದಾರೆ. ಅವರಿಗೆ ಓದು, ಪರಿಸರ, ಛಾಯಾಗ್ರಹಣ, ಪ್ರವಾಸ ಮತ್ತು ಗ್ರಾಮೀಣ ಬದುಕಿನ ಕುರಿತು ಆಸಕ್ತಿ.
೨೦೨೧ರಲ್ಲಿ ಫೇಸ್ ಬುಕ್ ನಲ್ಲಿ ಪರ್ಣ ಲೋಕ ಎಂಬ ಹೆಸರಲ್ಲಿ ಸುಮಾರು ೧೦೦ ಕಂತುಗಳಾಗಿ ವಿನಾಯಕ ಭಟ್ಟರು ಬರೆದಿದ್ದರು, ಆ ಲೇಖನಗಳು ಓದುಗರಿಗೆ ಮತ್ತೊಮ್ಮೆ ಸಿಗಲಿ ಎಂಬ ದೃಷಿಯಿಂದ ಬುಕ್ಸ್ ಲೋಕ ಪ್ರಕಟ ಮಾಡುತ್ತಿದೆ. ಈ ಎಲ್ಲಾ ಲೇಖನಗಳು ಮರುಪ್ರಕಟಣೆ ಮಾಡಲು ಅವಕಾಶ ನೀಡಿದ ವಿನಾಯಕ ಭಟ್ಟರಿಗೆ ಧನ್ಯವಾದಗಳು.
– ಭಾರ್ಗವಿ, ಬುಕ್ಸ್ ಲೋಕ
No products in the cart.