ಒಂದು ಎಲೆ ಅಥವಾ ಎಲೆಗೊಂಚಲು ಎಷ್ಟು ಭಾರ ಇರುತ್ತೆ? ಕೆಲವು ಗ್ರಾಮಿನಷ್ಟು, ಅಬ್ಬಬ್ಬಾ ಅಂದರೆ ಕಾಲು ಅಥವಾ ಅರ್ಧ ಕಿಲೋ ಅಲ್ವಾ? ಈಗ ನಮ್ಮ ಕಲ್ಪವೃಕ್ಷ ತೆಂಗಿನ ಮರದ ಎಲೆ ನೆನಪು ಮಾಡ್ಕೊಳ್ಳಿ. ತೆಂಗಿನ ಹೆಡದ (ಎಲೆ) ತೂಕ ಎಷ್ಟು? ಆಕಸ್ಮಾತ್ ಹಸಿಯಾದ ಹೆಡ ಐವತ್ತರವತ್ತು ಅಡಿ ಎತ್ತರದಿಂದ ಬೀಳುವಾಗ ಕೆಳಗೆ ಸಿಕ್ಕರೆ ನಮ್ಮ ಕಥೆ ಏನಾದೀತು? ನೆನೆಸಿದರೆ ಮೈ ಜುಂ ಎನ್ನುವುದಲ್ಲವೆ? ಎಲೆಗಳ ವೈವಿಧ್ಯಕ್ಕೆ ಇದೊಂದು ಒಳ್ಳೆಯ ಉದಾಹರಣೆ.
ತೆಂಗಿನ ಗರಿಯ ಚಂದದ ವಿವರಣೆ:
“ಎಲೆಗಳು 2ರಿಂದ 4ಮೀಟರ್ ಉದ್ದ ಇವೆ, ಪುಕ್ಕಗಳಂತೆ ಕಾಣುತ್ತವೆ. ಗಟ್ಟಿಯಾದ ಮಧ್ಯನರವಿದ್ದು ಅದರ ಮೇಲೆ ಅಸಂಖ್ಯಾತ ಉಪ ಎಲೆಗಳು ಅಂಟಿರುತ್ತವೆ. ಉಪಎಲೆಗಳು ಗರಿಯ ಹಸಿರು ಭಾಗವಾಗಿದ್ದು ಅವು 100ಕ್ಕಿಂತಲೂ ಹೆಚ್ಚು ಸಂಖ್ಯೆಯಲ್ಲಿರುತ್ತವೆ. ಪ್ರತಿಯೊಂದು 60ರಿಂದ 80 ಸೆಂ.ಮೀ. ಉದ್ದವಿರುತ್ತವೆ ಮತ್ತು ಬಹಳ ಗಟ್ಟಿ ಅಥವಾ ತೊಗಲಿನಂತಿರುತ್ತವೆ; ಹಸಿರು ಬಣ್ಣದಲ್ಲಿದ್ದು ಹೊಳಪಾಗಿರುತ್ತವೆ.” ಇದು
‘ಸಾಮಾನ್ಯ ಮರಗಳು’ ಪುಸ್ತಕದ್ದು. ಲೇಖಕರು – ಡಾ.ಎಚ್. ಸಂತಪು, ಅನುವಾದ- ವಿಜಯ್ ಅಂಗಡಿ Vijay Angadi . ನ್ಯಾಷನಲ್ ಬುಕ್ ಟ್ರಸ್ಟ್ ಪ್ರಕಟಣೆ.
ಇನ್ನು ತೆಂಗಿನ ಗರಿಯ ಉಪಯೋಗ ನಿಮಗೆಲ್ಲ ಗೊತ್ತಿದೆ. ಚಪ್ಪರ, ಚಾಪೆ, ಕಡ್ಡಿ ಹಿಡಿ, ಉರುವಲು ಇತ್ಯಾದಿ.
ಒಂದು ತಮಾಷೆ ನೋಡಿ. ಅಡಿಕೆ ಮರಕ್ಕಿಂತ ತೆಂಗಿನ ಮರ ದಪ್ಪ ಮತ್ತು ಗಟ್ಟಿ. ಆದರೆ ಅಡಿಕೆ ನೇರವಾಗಿ ಬೆಳಿಯುತ್ತೆ, ತೆಂಗಿನ ಕಾಂಡ ಯಾವಾಗಲೂ ಅಂಕುಡೊಂಕು. ಎಲೆಗೆ ಬಿಸಿಲು ಹುಡುಕಿ ಬಾಗಿ ಬಳುಕುತ್ತಂತೆ ತೆಂಗಿನ ಮರ!
– ವಿನಾಯಕ ಭಟ್ಟ, ನರೂರ
#ಎಲೆ #ನರೂರ #leaves
ವಿನಾಯಕ ಭಟ್ಟ ಅವರು ಉತ್ತರ ಕನ್ನಡ ಜಿಲ್ಲೆಯ ಶಿರಸಿ ತಾಲೂಕಿನ ನರೂರ ಗ್ರಾಮದವರು. ವಿಜ್ಞಾನ ಪದವೀಧರರು ಆಗಿರುವ ಇವರು ನಿವೃತ್ತ ಬ್ಯಾಂಕ್ ನೌಕರರು. ೨೦೦೪ರಿಂದ ಕೃಷಿಯಲ್ಲಿ ತೊಡಗಿಕೊಂಡಿದ್ದಾರೆ. ಅವರಿಗೆ ಓದು, ಪರಿಸರ, ಛಾಯಾಗ್ರಹಣ, ಪ್ರವಾಸ ಮತ್ತು ಗ್ರಾಮೀಣ ಬದುಕಿನ ಕುರಿತು ಆಸಕ್ತಿ.
೨೦೨೧ರಲ್ಲಿ ಫೇಸ್ ಬುಕ್ ನಲ್ಲಿ ಪರ್ಣ ಲೋಕ ಎಂಬ ಹೆಸರಲ್ಲಿ ಸುಮಾರು ೧೦೦ ಕಂತುಗಳಾಗಿ ವಿನಾಯಕ ಭಟ್ಟರು ಬರೆದಿದ್ದರು, ಆ ಲೇಖನಗಳು ಓದುಗರಿಗೆ ಮತ್ತೊಮ್ಮೆ ಸಿಗಲಿ ಎಂಬ ದೃಷಿಯಿಂದ ಬುಕ್ಸ್ ಲೋಕ ಪ್ರಕಟ ಮಾಡುತ್ತಿದೆ. ಈ ಎಲ್ಲಾ ಲೇಖನಗಳು ಮರುಪ್ರಕಟಣೆ ಮಾಡಲು ಅವಕಾಶ ನೀಡಿದ ವಿನಾಯಕ ಭಟ್ಟರಿಗೆ ಧನ್ಯವಾದಗಳು.
– ಭಾರ್ಗವಿ, ಬುಕ್ಸ್ ಲೋಕ
No products in the cart.