ಇತ್ತೀಚಿನ ದಿನಗಳಲ್ಲಿ ಕಿವಿಗೆ ಆಗಾಗ್ಗೆ ತಾಕುವ ಪದಗಳು ಎಂದರೆ ಇನೊವೇಶನ್‌ ಹಾಗೂ ಕೌಶಲ್ಯಾಭಿವೃದ್ಧಿ. ಭಾರತದಂತಹ ದೇಶಗಳು ವಿಶ್ವಸ್ತರದಲ್ಲಿ ಮೇಲೇರಬೇಕಾದರೆ ವಿಜ್ಞಾನ ಹಾಗೂ ತಂತ್ರಜ್ಞಾನದಲ್ಲಿ ಮುನ್ನಡೆಯದೆ ವಿಧಿಯಿಲ್ಲ ಎನ್ನುವುದನ್ನು ಎಲ್ಲರೂ ಒಪ್ಪಿಕೊಂಡಾಗಿದೆ. ಆದರೆ ಇದನ್ನು ಸಾಧಿಸುವ ವಿಧಾನಗಳ ಬಗ್ಗೆ ಇನ್ನೂ ಸ್ಪಷ್ಟ ಚಿತ್ರಣವಿಲ್ಲ. ಆ ಸಂದರ್ಭದಲ್ಲಿ ಈ ಎರಡು ಪದಗಳನ್ನೂ ಬಿಡುಬೀಸಾಗಿ ಬಳಸುವುದು ಸಾಮಾನ್ಯ.
ಇನೊವೇಶನ್‌ ಎಂದರೆ ಹೊಸ ಶೋಧ ಅಥವಾ ಇರುವ ಸಾಧನ, ವಿಧಿ, ಪ್ರಯೋಗಗಳಲ್ಲಿ ಸುಧಾರಣೆಯನ್ನು ತರುವುದು ಎಂದರ್ಥವಿದ್ದರೂ ಇತ್ತೀಚೆಗೆ ಇದು ಬಹುತೇಕ ಸಾಧನ, ಸಲಕರಣೆಗಳ ಆವಿಷ್ಕಾರ ಎಂಬುದಕ್ಕಷ್ಟೆ ಸೀಮಿತಿವಾಗಿದೆ ಎನಿಸುತ್ತದೆ. ಭಾರತೀಯ ಯುವಜನತೆಯಲ್ಲಿ ಇನೊವೇಶನ್‌ ಪ್ರಕ್ರಿಯೆಯ ಬಗ್ಗೆ ಅರಿವು ಮೂಡಿಸಿ, ಅದರಲ್ಲಿ ತೊಡಗಿಕೊಳ್ಳುವಂತೆ ಮಾಡಬೇಕೆನ್ನುವ ಹಂಬಲ ಇತ್ತೀಚಿನದೇನಲ್ಲ. ಏಕೆಂದರೆ ಇದಕ್ಕಾಗಿ ಈಗಾಗಲೇ ರಾಷ್ಟ್ರಮಟ್ಟದಲ್ಲಿ ಇನೊವೇಷನ್‌ ಫೌಂಡೇಶನ್‌ ಎನ್ನುವ ಸಂಸ್ಥೆಯನ್ನೂ ಸ್ಥಾಪಿಸಿ, ಉಪಯುಕ್ತ ನವಶೋಧಗಳನ್ನು ಗುರುತಿಸಿ, ಹುರಿದುಂಬಿಸುವ ಕೆಲಸ ನಡೆದಿದೆ. ನ್ಯಾಶನಲ್‌ ಇನೊವೇಶನ್‌ ಫೌಂಡೇಶನ್‌ ಎನ್ನುವ ಈ ಸಂಸ್ಥೆ, ನವಶೋಧಗಳ ಅಗತ್ಯ, ಅದನ್ನು ಸಾಧಿಸುವ ಮಾರ್ಗಗಳು, ಜರೂರು ಇರುವ ನವಶೋಧಗಳ ಬಗ್ಗೆ ಮಾಹಿತಿ ಮೊದಲಾದವನ್ನು ಬಿತ್ತರಿಸುತ್ತಲಿದೆ. ಅದಕ್ಕಾಗಿ ಅಗತ್ಯವಾದ ತರಬೇತಿಯನ್ನೂ ಆಗಾಗ್ಗೆ ನೀಡುತ್ತಲಿದೆ. ಇದು ಮುಖ್ಯವಾಗಿ ಉದ್ಯಮ ಕ್ಷೇತ್ರದಲ್ಲಿರುವವರಿಗೆ ಅನುಕೂಲ ಮಾಡಿಕೊಡುವ ವ್ಯವಸ್ಥೆ.
ಬೆಳೆವ ಸಿರಿ ಮೊಳಕಯಲ್ಲಿ ಎಂಬ ಮಾತನ್ನು ಆಚರಣೆಗೆ ತರುವ ಹಲವು ಕಾರ್ಯಕ್ರಮಗಳೂ ನಡೆದಿವೆ. ಶಾಲಾಮಟ್ಟದಲ್ಲಿಯೇ ಇನೊವೇಶನ್‌ ಹಾಗೂ ಕೌಶಲ್ಯಗಳನ್ನು ಅಭಿವೃದ್ಧಿ ಪಡಿಸಲು ಹಲವು ಯೋಜನೆಗಳನ್ನೂ ಸರಕಾರ ಹಮ್ಮಿಕೊಂಡಿದೆ. ಇದಕ್ಕೆ ಕಾರಣ: ಕಾಲೇಜುಗಳಿಂದ ಹೊರಬರುವ ವಿಜ್ಞಾನ ಹಾಗೂ ಇಂಜಿನಿಯರಿಂಗ್‌ ಪದವೀಧರರಿಗೆ ಉದ್ಯಮಕ್ಕೆ ಅವಶ್ಯಕವಾಗಿರುವಂತಹ ಕೈಚಳಕಗಳು ಅಥವಾ ಕೌಶಲ್ಯ ಇಲ್ಲದಿರುವುದು. ಕ್ಯಾಂಪಸ್‌ ಇಂಟರ್‌ವ್ಯೂಗಳನ್ನು ನಡೆಸುವ ಉದ್ಯಮಗಳು, ಹೊಸ ಪದವೀಧರರನ್ನು ಪಳಗಿಸುವ ತರಬೇತಿ ಕಾರ್ಯಕ್ರಮಗಳ ವೆಚ್ಚವೇ ಭಾರಿ ಎಂದು ದೂರುತ್ತವೆ. ನಮ್ಮ ಶಾಲಾ, ಕಾಲೇಜು ಪಠ್ಯಕ್ರಮಗಳು ಕೇವಲ ಸೈದ್ಧಾಂತಿಕ ವಿಚಾರಗಳನ್ನಷ್ಟೆ ಮುಂದಿಟ್ಟು, ಅವನ್ನು ನಿಜಜೀವನದಲ್ಲಿ ಬಳಸಲು ಅಗತ್ಯವಾದ ಕೌಶಲ್ಯಗಳನ್ನು ಕಲಿಸದೇ ಹೋಗಿರುವುದು ಇದಕ್ಕೆ ಮೂಲ ಎನ್ನಬಹುದು.
ಈ ಕೊರತೆಯನ್ನು ನೀಗಿಸಲು ಹೊಸ ಉಪಾಯಗಳನ್ನು ಉದ್ಯಮಗಳು ಹಾಗೂ ಶೈಕ್ಷಣಿಕ ಸಂಸ್ಥೆಗಳು ಈಗ ಕಂಡುಕೊಳ್ಳಬೇಕಿದೆ. ಇದುವರೆವಿಗೂ ಉದ್ಯಮಗಳಲ್ಲಿ ಇಂಟರ್ನ್‌ಶಿಪ್‌ ಅಥವಾ ವಿದ್ಯಾರ್ಥಿ ದೆಸೆಯಲ್ಲಿಯೆ ತರಬೇತಿ ಪಡೆಯುವುದು ಒಂದು ಮಾರ್ಗವೆನ್ನಿಸಿತ್ತು. ಇದರ ವೆಚ್ಚವನ್ನು ಭರಿಸುವವರು ಯಾರು ಎನ್ನುವ ಪ್ರಶ್ನೆಗೆ ಉತ್ತರ ಇನ್ನೂ ಸಿಕ್ಕಿಲ್ಲ. ಇನ್ನೊಂದೆಡೆ, ಶಾಲಾಕಾಲೇಜುಗಳಲ್ಲಿರುವ ಎಲ್ಲ ಉದ್ಯೋಗಾಪೇಕ್ಷಿಗಳಿಗೂ ಇಂತಹ ತರಬೇತಿ ಆಗಗೊಡುವ ವ್ಯವಸ್ಥೆ ಬಹಳ ದುಬಾರಿಯೂ ಆಗುತ್ತದೆ. ಇವೆಲ್ಲದರ ಜೊತೆಗೆ ಅತಿ ಕ್ಷಿಪ್ರವಾಗಿ ಬದಲಾಗುತ್ತಿರುವ ತಂತ್ರಜ್ಞಾನ ಮತ್ತೊಂದು ಸವಾಲನ್ನು ಒಡ್ಡುತ್ತಿದೆ. ಇಂದಿನ ಉದ್ಯಮಗಳಿಗೆ ಅಗತ್ಯವಾದಂತಹ ಕೌಶಲ್ಯಗಳನ್ನು ಬೆಳೆಸಿಕೊಂಡರೆ ಸಾಲದು. ನಾಳಿನ ಅಗತ್ಯಗಳನ್ನು ಪೂರೈಸುವ ಕೌಶಲ್ಯವನ್ನೂ ಕರಗತ ಮಾಡಿಕೊಳ್ಳದಿದ್ದರೆ, ಹೊಸ ಪದವೀಧರರಿಗೆ ಉದ್ಯೋಗದ ಅವಕಾಶಗಳು ಕುಂದಬಹುದು. ಹಾಗೆಯೇ ಉದ್ಯಮಗಳಿಗೆ ಸಮರ್ಥ ಸಿಬ್ಬಂದಿಯ ಕೊರತೆಯೂ ಆಗಬಹುದು.
ಈ ನಿಟ್ಟಿನಲ್ಲಿ ಕೌಶಲ್ಯಾಭಿವೃದ್ಧಿಯ ಕೆಲವು ಕಾರ್ಯಕ್ರಮಗಳು ನಡೆಯುತ್ತಿರುವುದು ಸ್ವಾಗತಾರ್ಹ. ಆದರೆ ಇವು ತಕ್ಷಣದ ಉದ್ಯೋಗಾವಕಾಶಗಳನ್ನು ಮಾತ್ರ ಗಮನದಲ್ಲಿಟ್ಟುಕೊಂಡಂತೆ ಆಗಿವೆ. ಉದಾಹರಣೆಗೆ, ಪದವಿ ವಿದ್ಯಾರ್ಥಿಗಳಿಗೆ ಸಂವಹನ ಕಲೆ, ಭಾಷಣ ಹಾಗೂ ಲೇಖನ ಕಲೆಗಳನ್ನು ತಿಳಿಸಿಕೊಡುವ ಕಾರ್ಯಕ್ರಮಗಳನ್ನು ಸರ್ಕಾರವೇ ಯೋಜಿಸಿದೆ. ಹಾಗೆಯೇ, ಕನ್ನಡ ಮಾಧ್ಯಮದಲ್ಲಿ ಕಲಿತವರಿಗೆ ಸಂಭಾಷಣೆಗೆ ಅನುಕೂಲವಾಗಲೆಂದು ಇಂಗ್ಲೀಷು ಕಲಿಸುವ ಪ್ರಯತ್ನಗಳೂ ನಡೆದಿವೆ. ಎಲ್ಲ ಉದ್ಯಮಗಳಲ್ಲಿಯೂ ಕಾಲಿಟ್ಟಿರುವ ಕಂಪ್ಯೂಟರುಗಳನ್ನು ಸಮರ್ಪಕವಾಗಿ ಬಳಸುವ ಕೌಶಲ್ಯವನ್ನೂ ತಿಳಿಸಿಕೊಡಲಾಗುತ್ತಿದೆ. ಅಕ್ಷರಸ್ಥರಲ್ಲದವರಿಗೆ ಜೀವನೋಪಾಯವನ್ನು ಕಲ್ಪಿಸುವ ಟೈಲರಿಂಗ್‌, ಬ್ಯೂಟೀಶಿಯನ್‌, ಮೊಬೈಲು ರಿಪೇರಿ ಮೊದಲಾದ ಕೆಲಸಗಳಲ್ಲಿ ತರಬೇತಿ ನೀಡಲಾಗುತ್ತಿದೆ.
ಇವೆಲ್ಲವೂ ಜನಪ್ರಿಯ ಎನ್ನಿಸುವ ಉದ್ಯೋಗ ಮಾರ್ಗಗಳನ್ನು ಗಮನದಲ್ಲಿಟ್ಟುಕೊಂಡು ಮಾಡಿದಂಥವು. ಜೊತೆಗೆ ಇವು ಪ್ರತಿ಼ಷ್ಠೆಯ ಕೌಶಲ್ಯಗಳೂ ಕೂಡ. ಆದರೆ ನಮಗೆ ಅಗತ್ಯವಿರುವುದು ಇವುಗಳಷ್ಟೇಯೋ? ಅತಿ ಭರದಿಂದ ಬೆಳೆಯುತ್ತಿರುವ ಕಟ್ಟಡ ನಿರ್ಮಾಣಗಳು, ಕಟ್ಟಡ ನಿರ್ವಹಣೆ, ಸಾರಿಗೆ ನಿರ್ವಹಣೆ ಮೊದಲಾದವನ್ನು ನಿಭಾಯಿಸಲೂ ಕೌಶಲ್ಯಮತಿಗಳು ಬೇಕಾಗಿದ್ದಾರೆ. ಇಂತಹ ಕ್ಷೇತ್ರಗಳಲ್ಲಿ ಪಾರಂಪರಿಕವಾಗಿ ಬೇಡಿಕೆಯಲ್ಲಿರುವ ಬಡಗಿ, ಕಮ್ಮಾರ, ಗಾರೆಯ ಕೆಲಸಗಳೂ ಹೊಸ ತಂತ್ರಜ್ಞಾನಗಳನ್ನು ಬಳಸುತ್ತಿವೆ. ಹೊಸ ತಂತ್ರಜ್ಞಾನಗಳನ್ನು ರೂಪಿಸುತ್ತಿವೆ. ಆದ್ದರಿಂದ ಇಂತಹ ಪಾರಂಪರಿಕೆ ಉದ್ಯಮ ಎನ್ನುವ ಕ್ಷೇತ್ರಗಳಲ್ಲಿ ಈಗಾಗಲೇ ತೊಡಗಿಕೊಂಡಿರುವ ಕುಶಲಕೆಲಸಗಾರರಿಗೂ ಕೌಶಲ್ಯಾಭಿವೃದ್ಧಿಯ ಅವಶ್ಯಕತೆ ಇದೆ. ವೈಯಕ್ತಿಕ ಹಂಬಲವಿರುವವರಷ್ಟೆ ಇದನ್ನು ಪಡೆಯುತ್ತಿದ್ದಾರೆ. ಆದರೆ ಇಡೀ ದೇಶ ಮುಂದುವರೆಯುವ ಕನಸು ನನಸಾಗಬೇಕಾದರೆ ಇಂತಹ ಪಾರಂಪರಿಕ ಕುಶಲಕೆಲಸಗಾರರಿಗೂ ಕೌಶಲ್ಯಾಭಿವೃದ್ಧಿಯ ತರಬೇತಿಗಳನ್ನು ನೀಡಬೇಕಾಗಿರುವುದು ಅವಶ್ಯ. ಇದಕ್ಕೆ ಸರಕಾರವಷ್ಟೆ ಹೊಣೆಯಾಗದೆ, ಉದ್ದಿಮೆಗಳೂ ಕೈ ಜೋಡಿಸಬೇಕಿದೆ. ಆಗಷ್ಟೆ ಸರ್ವತೋಮುಖವಾದ ಬೆಳೆವಣಿಗೆ ಸಾಧ್ಯ. ಹೊಸ ಉದ್ಯೋಗಾವಕಾಶಗಳನ್ನು ರೂಪಿಸುವುದೂ ಸಾಧ್ಯ.
ಈ ಲೇಖನವು ಮಾರ್ಚ್ ತಿಂಗಳ ಕುತೂಹಲಿ ಕನ್ನಡ ವಿಜ್ಞಾನ ಪತ್ರಿಕೆಯಲ್ಲಿ ಪ್ರಕಟವಾಗಿದೆ. ಪೂರ್ಣ ಸಂಚಿಕೆಯನ್ನು ಕೆಳಗಿನ ಲಿಂಕ್ ಮೂಲಕ ಡೌನ್ಲೋಡ್ ಮಾಡಿಕೊಂಡು ಓದಬಹುದು.
ಮಾರ್ಚ್ ಸಂಚಿಕೆಗೆ ಇಲ್ಲಿ ಕ್ಲಿಕ್ ಮಾಡಿ
ಹೊಸ ಚಂದಾದಾರರಾಗಲು ಈ ಫಾರಮನ್ನು ಭರ್ತಿ ಮಾಡಿ. ಮುಂದಿನ ಸಂಚಿಕೆ ನಿಮ್ಮನ್ನು ಈಮೇಲಿನಲ್ಲಿ ತಲುಪುವುದು. https://forms.gle/
No products in the cart.